Aurtengo edizioaren berritasun gisa, Basque Circular Summit 2025ek lehen aldiz jarri du martxan Basque Circular VILLAGE. Bertan, ekonomia zirkularraren alde lan egiten duten eragile eta erakunde guztiek beren jarduerak partekatzeko eta ezagutarazteko gunea izango dute.
Basque Circular VILLAGE 20 stand modularren inguruan egituratuko da (guztiak ezaugarri berberekin); standak jasotako proposamenen arabera esleituko dira.
Hautaketa prozesuan kontuan hartuko da erakundeen balio proposamena, beren jarduerarekin baliabideen erabilera eraginkorragoa bultzatzen duten neurrian, ingurumen jarduketarako beste estrategia nagusiekin batera (klima aldaketaren, biodibertsitate galeraren… aurkako borroka).
Konponbideak eta ikuspegiak ekonomia zirkularraren hainbat ikuspuntutatik baloratuko dira: gobernantza, finantzak, negozioak, eragile anitzeko lankidetza…
Nolakoak izango dira standak?
Stand guztiek ezaugarri berberak izango dituzte. Hauek izango dira, oro har:
- Tamaina: 3 m2 (gutxi gorabehera).
- Seinaleetarako horma (panel horren diseinua enpresa erakusketariak egingo du) eta logotipoa (errotulagarria, inprimatua ere).
- Led bonbillen bidezko argiteria.
- Mahai-gaina.
- Gauzak gordetzeko armairua sarrailarekin.
- 2 aulki altu.
- 3 gailutarako elektrizitatea.
- Telebista pantaila.
- Standa egiteko erabiliko diren materialek ekonomia zirkularraren printzipioak errespetatu beharko dituzte, jasangarriak eta berrerabilgarriak izanik.
“SIDE EVENTS”
BCS2025eko biltzar atalean, Basque Circular FORUMean hain zuzen ere, programa ofizialarekin batera, 8 saio gorde dira “side events” edo ekitaldi paraleloak garatzeko.
Basque Circular VILLAGE osatzen duten erakundeek ekitaldi paralelo horietako bat antolatzeko aukera izango dute. Horretarako, eskaera-inprimakian saioaren helburua, parte-hartzaile potentzialak eta publiko objektiboa adierazi beharko dute.
Eskaerak ebaluatu ondoren, Ihobek onartu dituen saio paraleloen berri emango du. Ihobek kosturik gabe emango dizkio hautatutako erakundeari bai aretoa bai saioa egin ahal izateko baliabide teknikoak, eta saioa erakunde antolatzaileak kudeatuko du osoki.
Basque Circular VILLAGEn dauden erakundeek bakarrik ahal izango dute “Side events” prestatu
Zehaztapenak eta baldintzak
- Parte hartzen duten erakundeek konpromisoa hartzen dute 2025eko apirilaren 2an, 3an eta 4an Basque Circular Summit 2025ek Euskaduna Jauregian (Bilbo) duen erakusketa-eremuan aktiboki egoteko, eta biltzarraren atsedenaldietan ezin izango dute standa hutsik utzi.
- Debekatuta dago salmenta oro erakusketa-gunean eta esparru osoan.
- Parte-hartzaile bakoitzak 750 € ordainduko ditu standaren fabrikazio- eta pertsonalizazio-kostuengatik; erakunde erakusketariak hautatu ondoren fakturatuko dira. Ordaintzeko epea 20 egunekoa da, proposamena onartu dela jakinarazi eta gero.
- Debekatuta dago Ihoberen izena edo logotipoa erabiltzea, baita “Basque Circular Summit 2025” marka edo haren laburdura (“BCS2025”) edo logotipoa ere, Ihoberen aldez aurreko baimen idatzirik gabe.
- Erakunde erakusketariak kokapenari eta bere eskura jarritako altzariei buruz Ihobek emango dizkion jarraibideak betetzeko konpromisoa hartzen du. Era berean, kongresua itxi eta berehala, stand eremutik eta ekitaldiaren lekutik kenduko ditu bere gauzak.
- Erakunde erakusketariak ekitaldian dauden ondasun higigarriei eta higiezinei eragindako kalte guztien erantzule da.
- Erakunde erakusketariak konpromisoa hartzen du suteen aurkako segurtasunaren eta beste segurtasun-neurri batzuen arloan ekitaldia egiten den tokiko agintariek edo langileek emandako jarraibideak betetzeko.
- Eztabaida, desadostasun eta erreklamazio guztiak aldeen arteko negoziazioen bidez konponduko dira nagusiki. Akordiorik ez bada lortzen, Ihobek ezarritako irizpidea ezarriko da.
Izen-ematea
Basque Circular Village 2025eko parte izatea eskatzeko inprimakiak bi atal bereizi izango ditu: bata, izaera orokorrekoa, erakundearen eta harremanetarako pertsonaren datuekin, eta bestea, espezifikoa, eskainitako zerbitzu eta soluzio zirkularren zerrendarekin.
