• Ekonomia zirkularraren Euskadiko erakusleiho handienak hautagaitzak onartzen ditu oraindik

• Basque Circular EXPO kongresua networking ingurune bihurtuko da, esperientziak partekatzeko eta negozio aukerak sortzeko

Apirilaren 2tik 4ra Bilboko Euskaldunan egingo den Basque Circular Summit 2025erako atzerako kontaketa hasi da eta, horrekin batera, euskal enpresek, ekonomia zirkularraren aldeko apustuan, Europa hegoaldeko erakusleiho handienean soluzio berritzaileak erakusteko aukera izango dute hemen: Basque Circular EXPO.

Europa hegoaldeko ekonomia zirkularraren kongresu handienaren edizio honetan, EXPOk Euskadin fabrikatutako produktu zirkularrak bertatik bertara ezagutzeko aukera emango die bisitariei. Helburua da bizi zikloaren ikuspegitik ekodiseinuko metodologiak aplikatu zaizkien eta, beraz, ingurumen inpaktua nabarmen murriztu duten soluzioen aukera zabala eskaintzea.

Alabaina, hori baino askoz ere gehiago izango da Basque Circular EXPO. Networkinga egiteko, esperientziak trukatzeko eta negozio aukera berriak sortzeko topagunea izango da, eta agerian utziko du ekonomia zirkularrerako trantsizioan euskal enpresa sarearen ahalegina.

Izena emateko azken egunak

Erakusketa honetan parte hartu nahi duten enpresak garaiz dabiltza oraindik, eta ekonomia zirkularreko 3 produktu edo soluzio erakusteko aukera izango dute. Epea otsailaren 28an amaituko da.

Aldi berean, parte hartzen duten enpresek Basque Circular BEST sarien lehen edizioan parte hartu ahal izango dute, Ihobe-Ingurumen Jarduketarako Sozietate Publikoak sustatuta. Sari horiek ekonomia zirkularreko ekimen onenak aitortuko dituzte lau kategoriatan: produktu zirkularrenari saria, zerbitzu zirkularrenari saria, negozio eredu zirkularrenari saria, eta soluzio zirkularrena eskaintzen duen start-upari saria.

Basque Circular Summit 2025 Europa hegoaldeko ekonomia zirkularrari buruzko ekitaldi nagusia da, eta ekonomia zirkularrak enpresei eta Euskadiko ehun sozioekonomiko osoari eskaintzen dizkien erronka eta aukerak aztertzea du helburu. Kongresua nazioarteko eta tokiko adituen topagunea izango da, eta horretaz gain, Euskadin garatutako soluzio zirkularren erakusketa egongo da, bai eta ekonomia zirkularrean lan egiten duten ekimen eta eragile nagusiak biltzen dituen standen gune bat ere.