Basque Circular Summit

Alexander Boto, Ihobeko zuzendari nagusia: “Eredu ekonomiko zirkularra indartzeak erraztuko die euskal enpresei nazioarteko eremuko aldaketei aurre egitea”

admin — Fri, 04 Apr 2025 11:19:20 +0000

Basque Circular Summit 2025 Europako ekonomia zirkularraren erreferentziazko biltzar gisa finkatu da, 700 enpresa eta 1.300 parte-hartzaile baino gehiago mobilizatuz

Apirilaren 2tik 4ra bitartean Euskalduna Bilbaon eginda, biltzarrak egiaztatu du ekonomia zirkularra ez dela joera bat soilik, baizik eta euskal enpresen lehiakortasuna eta etorkizun jasangarria bermatzeko behar urgente bat

Halaber, Ihobeko zuzendari nagusiak azpimarratu du “euskal enpresa-ehuna europar jarraibideekin lerrokatzearen” garrantzia, zeren “zirkulartasunerako trantsizioa atzeraezina baita

Basque Circular Summit 2025 berretsi egin da Europako ekonomia zirkularraren inguruko ekitaldi nagusi gisa. Apirilaren 2tik 4ra bitartean, Euskalduna Bilbaon, sektoreko 700 euskal enpresa mobilizatu ditu eta 1.300 pertsona baino gehiago erakarri ditu. Eusko Jaurlaritzaren Ingurumen Jarduketarako Sozietate Publikoak antolatuta, biltzarrak 150 hizlari baino gehiago izan ditu, zirkulartasunarekin lotutako arloetakoak; horrez gain, baina, erakusketa handi bat izan du, non ehun euskal enpresa inguruk euren soluzio zirkularrak erakutsi baitituzte; halaber, standen eremu batean, hogei erakunde inguruk aukera izan dute euren ekimen eta proiektuak ezagutzera emateko.

Ihobeko zuzendari nagusi Alexander Boto Bastegietak adierazi duenez, “eredu ekonomiko zirkularra indartzeak erraztuko die euskal enpresei nazioarteko eremuko aldaketei aurre egitea”, are gehiago Donald Trumpen administrazioak iragarritako muga-zergen gerraren ostean. Eusko Jaurlaritzaren lehenengo estimazioen arabera, Euskadik Estatu Batuetara urtean esportatzen dituen 2.000 milioi euroetatik, ukitutako enpresek 400 milioi eurotik gorako gain-kostua jasan lezakete.

Euskal industria-ehuna erronka horren eta beste batzuen aurrean prestatzeko, Basque Circular Summit 2025 saiatu da enpresak aurrea hartu dezatela lortzea, europar plangintza eta araudi berria kontuan hartuta. Draghi txostenaren gomendioek inspiratuta, Europako Batzordeak bere “EBren lehiakortasunerako iparrorratza” plazaratu zuen 2024ko hasieran, hau da, lehiakortasun industriala indartzeko estrategia bat, geroago -aurten- osatu dena Itun Industrial Garbiarekin. Honek zirkulartasuna eta deskarbonizazioa integratzen ditu, sektore industrialaren ingurumen-aztarna murrizteko eta beraren efizientzia, berrikuntza eta autonomia estrategikoa hobetzeko.

“Ekonomia zirkularra ez da gehiago joera bat soilik, baizik eta baita euskal enpresen lehiakortasuna eta etorkizun jasangarria bermatzeko behar urgente bat ere”, baloratu du Botok; horrekin batera, azpimarratu du “ Basque Circular Summiten moduko biltzarrak funtsezkoak direla bide horretatik aurrera egiteko, ezagutza, berrikuntzak eta estrategiak konpartituz”. Halaber, Ihobeko zuzendari nagusiak azpimarratu du “euskal enpresa-ehuna europar jarraibideekin lerrokatzearen” garrantzia, zeren “zirkulartasunerako trantsizioa atzeraezina baita, eta Europak ezin du berak bakarrik baliabideen erabilera ez jasangarria gelditu”. “Euskadik badu borondatea, eta behar bezainbesteko prestakuntza du beharrezkoa den aldaketa horretan laguntzeko”, esan du bukatzeko.

Aurrera egiten jarraitzeko topagune bat

Ia 150 hizlarik modu aktiboan parte hartu dute biltzarraren hiru egun hauetan, eta horietako bat Mónica Chao da. Espainiako jasangarritasun estrategiko, enpresa-eraldaketa eta ESG lidergoaren arloko aditua, Chaok azpimarratu du Europak behar duela lehiakortasuna jasangarritasunaren bidez bultzatzen duen eraldaketa industrial bat, eta -bere esanetan- Euskadik zenbait urte daramatzala norabide horretan. “Deskarbonizazioaren, berrikuntzaren eta ekonomia zirkularraren alde egitea da, Clean Industrial Deal-arekin batera, aukera estrategiko bat gure autonomia industriala indartzeko eta kalitatezko enpleguak sortzeko, aurreikustekoa eta erresilientea den lege-testuinguru batean”, adierazi du.

Beste alde batetik, Janez Potocnikek, Nazio Batuen Ingurumen Programaren Baliabideen Nazioarteko presidentekide eta europar komisario ohiak hauxe azpimarratu du: “Beharrezkoa da gobernuek zeharkako izaera eman diezaiotela ekonomia zirkularrari, fiskalitate berdea eta erosketa publiko ekologikoa bultzatzeko, baina batez ere heziketa eta prestakuntza eskainiz”

Halaber, Basque Circular Summit 2025ek garbi utzi du gizarte eta ekonomia zirkularrerako aurrerapena ez dagoela finantzen mundutik kanpo. Izan ere, finantza jasangarrien esanahia da inbertsioari buruzko erabakiak hartzeko prozesuan ingurumenaren, gizartearen eta gobernu onaren faktoreak hartu behar direla kontuan (ESG, ingelesezko siglen arabera).

Beste alde batetik, biltzarrak aztertu du nola indartu daitekeen kontsumitzaileen rola kontsumo-ereduak aldatzeko, Europak abiatutako tresna berriak jorratuz, hala nola kontsumitzaileen ahalduntzeari buruzko 2024/825 Zuzentaraua, edo ingurumen-alegazioei buruzko etorkizuneko zuzentaraua. “Kontsumitzaileak garen aldetik, geuk ere bagara erantzuleak; izan ere, merkatuan dauden eragileetako bat gara, zirkulartasunaren katearen katebegi bat, geu ahalduntzeko eta ekonomia zirkularraren behin betiko ezartzen laguntzeko ahalmenarekin”, azpimarratu du Brenda Chávezek, jasangarritasunaren arloko ikerketa, datu eta soluzioetan espezializatutako kazetariak, biltzarrean emandako hitzaldian.

Finantza jasangarriak eta ekonomia zirkularrean norbanako gisa daukagun rola hizpide Basque Circular Summit 2025 jardunaldiko bigarren egunean

admin — Thu, 03 Apr 2025 17:14:58 +0000

Udalerri zirkularrak, Jasangarritasun Korporatiboaren Txostenari buruzko Zuzentaraua (CSRD), hondakinen Europako esparrua, jasangarritasunak izan duen bilakaera positiboa, greenwashinga eta Europako taxonomia izan dira jorratu diren beste gaietako batzuk
Basque Circular BEST sari-banaketaren lehenengo edizioan Fagor Ederlan, Somos Oreka, Gamesa Gearbox eta Fuelium saritu dituzte

Basque Circular Summit 2025, Europa hegoaldean egiten den ekonomia zirkularraren inguruko jardunaldirik garrantzitsuena, erdibidera iritsi da. Eta, egunean zehar egin diren saio plenarioetan finantza jasangarriak eta norbanako gisa ekonomia zirkularraren aurrean daukagun rola aletu dira. Era berean, finantza erakundeek Europa ekonomia zirkularraren bidean jartzeko eta kontsumo ohiturak aldatzeko daukaten papera aztertu da.

FORUM guneko hitzaldietan, beste hainbat gaien artean, beste hauek ere izan dira hizpide: udalerri zirkularrak, Jasangarritasun Korporatiboaren Txostenari buruzko Zuzentaraua, hondakinen Europako esparrua, jasangarritasunak izan duen bilakaera positiboa, greenwashinga edota Europako taxonomia.

Bigarren egunean zehar, Europan abiatu diren hainbat ekimen aztertu dira, begirada, batez ere, gure udalerrietan aplikatzeko formuletan jarriz. Ekimen horietan kokatzen dira Circular Cities and Regions Initiative CCRI eta The Circular City Centre C3. Gainera, zenbait adituk, eta enpresek, Jasangarritasun Korporatiboaren Txostenari buruzko Zuzentaraua (CSRD) izan dute hizpide. CSRD derrigorrezkoa izango da 2025ean eta, besteak beste, gardentasun korporatiboaren garrantzia azpimarratzen du lehiakortasunean eta inbertsoreen arteko erlazioan hobetzeko.

Lehenengo saio plenarioan, Europako finantza erakundeek ekonomia zirkularra sustatzeko daukaten garrantziaz hitz egin da. Izan ere, finantza jasangarriek garapen jasangarria sustatzen duten hainbat finantza-produktu diseinatzeko aukera ematen dute, eta errentagarritasuna eta jasangarritasuna orekatzen saiatzen dira.

Jarraian Hondakinen Europako esparruaz eta ETEen jasangarritasunaren ebaluazioaz hitz egin da. Hondakinak murrizteko, eta ingurumenean sortzen duten eragina txikitzeko, Europar Batasunak anbizio handiko helburuak zehaztu ditu birziklapenari eta isuriari dagokionez, korronte ezberdinak txertatzeko helburuarekin. Gaur egun, gainera, Europa Hondakinei buruzko Esparru Zuzentaraua berrikusten ari da, batez ere elikagaien eta ehunen hondakinei buruzkoa.

Enpresa txiki eta Ertainek, ETEek, protagonismoa izan dute bigarren lan-saioan. Programa berriak garatzeko beharraz hitz egin da, hain zuzen, iraunkortasunaren bilakaera positiboari mesede egingo dioten laguntza-programak aipatu dira.

Azkenik, kontsumitzaileok ekonomia zirkularrean jokatzen dugun rola aztertu da, baita greenwashing-a eta Europako Taxonomia. Batez ere, ohitura aldaketaren beharra azpimarratu da, eta, norabide horretan, zenbait gako eman dira.

Arratsaldeko saioetako batean, galdera hau erantzuten saiatu dira parte-hartzaileak: nola jakinaraz ditzakete enpresek jasangarritasun arloan egiten dituzten ekimenak, greenwashing-eko salaketak jasotzera menturatu gabe? (kontuan hartuz egoera horrek ekarriko lituzkeen kalte-ekonomiko eta ospe galerak.) Europar taxonomiak ezarritako helburuak ere landu dira; hain zuzen, finantza-sektoreak ekonomia zirkularra sustatzeko gakoak eman dira. Helburu hori lortzeko jarduera-ekonomikoak sailkatzeko sistema bat sortu dela azaldu da, eta sistema horren bidez, jarduera horien ingurumen-jasangarritasunaren maila finkatzeko aukera dagoela.

Kongresutik konpromisoetara

Baina Basque Circular Summit biltzarra baino gehiago da eta, atzotik, euskal enpresak ekonomia zirkularrean duten konpromisoari balioa ematen ari dira Basque Circular EXPOn; bertan, 100 enpresa baino gehiagok parte hartzen ari dira, eta, guztira, 150 produktutik gora aurkeztu dituzte.

Aurten, lehen aldiz, Basque Circular BEST sariak banatu dira, Euskadin ekonomia zirkularra bultzatzen duten soluzio, zerbitzu, negozio unitatea enpresa-produktuak saritzeko. Fagor Ederlan, Somos Oreka, Gamesa Gearbox eta Fuelium izan dira enpresa sarituak, eta, Irantzu Allenderen, Eusko Jaurlaritzako Trantsizio Energetikoko sailburuaren, eta Alex Botoren, IHOBEko zuzendari nagusiaren, eskutik jaso dituzte.

Basque Circular VILLAGE-k osatu du jardunaldiaren hirugarren zutabea. Ekonomia zirkularraren esparruan lanean ari diren eragile eta entitateek bere lan-jarduna eta bere proiektuak aurkezteko aukera izan dute. Orotara, hogei stand baino gehiagok osatu dute gunea, tartean, Eusko Jaurlaritzako, Nafarroako Gobernuko eta Kataluniako Generalitat-eko ordezkariak izan dira.

Fagor Ederlan, Somos Oreka, Gamesa Gearbox eta Fuelium sarituak izan dira, euren soluzio eta produktu zirkularrengatik, Basque Circular Summit 2025ean

admin — Thu, 03 Apr 2025 11:03:03 +0000

Basque Circular BEST 2025 sariek aitortzen dituzte Euskadiko produktu, zerbitzu, negozio-eredu eta enpresa emergente zirkular onenak

Eusko Jaurlaritzako Trantsizio Energetikoko sailburuorde Irantzu Allende eta Ihobeko zuzendari nagusi Alexander Boto izan dira sariak banatzeko arduradunak

Guztira lau sari eta hiru akzesit eman dira, 49 euskal enpresak aurkeztutako 65 hautagaitzen artean

Eusko Jaurlaritzako Trantsizio Energetikoko sailburuorde Irantzu Allendek eta Ihobeko zuzendari nagusi Alexander Botok Basque Circular BEST sariak banatu dizkiete gaur goizean Fragor Ederlan, Somos Oreka, Gamesa Gearbox eta Fuelium enpresei, Basque Circular Summit 2025 biltzarraren baitan. Ihobe sozietate publikoak bultzatutako sari hauek aurreneko aldiz aitortzen dituzte Euskadiko produktu, zerbitzu, negozio-eredu eta start up zirkular onenak.

Sariek oso harrera ona izan dute Basque Circular Summit biltzarreko EXPOn dauden enpresa guztien artean; izan ere, bertan erakusten diren 150 produktu eta zerbitzuetatik, 49 enpresak 65 hautagaitza aurkeztu dituzte.

Sariak banatzeko ekitaldian, Allende sailburuordeak azaldu du sarien sorrerak erantzuten diola Eusko Jaurlaritzak aspalditik detektatu duen behar bati. “Ekonomia zirkularraren euskal ekosistemak heldutasuna hartu du, soluzio erreal, ukigarri eta eskalgarriak sortzen ari da,,,,, eta aitortza-espazio propio bat merezi zuen”, adierazi du.

Basque Circular BEST sariek funtsezko aitortza bat dira ekonomia zirkularrerako trantsizioa gidatzen ari diren euskal enpresentzat. Bai enpresa handiak eta bai ETEak saritzean, aitortza horiek nabarmentzen dute berrikuntzak eta jasangarritasunak Euskadiko industria-ehunean duten garrantzia.

“Sari hauek katalizatzaile bat dira enpresa gehiago jardunbide jasangarriak hartzera bultzatzeko, lurraldeko ekonomia eraldatu dezakeen efektu biderkatzaile bat sortuz. Oraingo lorpenak ospatu ez ezik, etorkizunerako inspirazioa ere badira, ekonomia zirkularra salbuespena izatetik arau bihurtzera pasatu dadin”, adierazi du Botok.

Trantsizio Energetikoko sailburuordearekin eta Ihobeko zuzendariarekin batera, sari hauen epaimahaikideak arlo horretako adituak izan dira, hala nola Aitor Cobanera, Spri Taldeko Enpresen Sustapenerako zuzendaria; Xabier Caño, Aclimako presidentea; Carlos García, Mondragoneko Eskola Politeknikoko zuzendaria; María García de la Fuente, Ingurumen Informazioko Kazetaritzen Elkarteko presidentea; Olaia Irulegi, EIDE-Euskal Diseinuaren Elkarteko presidente ohia; Marcelo Leslbay, Deustuko Unibertsitateko Diseinuaren arloko irakasle eta ikertzailea; Rikardo Minguez, Euskal Herriko Unibertsitateko Ekonomia Zirkularreko Masterraren zuzendaria; eta Tamara Yagüe, CONFEBASKeko presidentea.

Aurkeztutako soluzio zirkularrak -65 baino gehiago- baloratzerakoan, epaimahaiak honako irizpide hauek hartu ditu kontuan, besteak beste: zirkulartasun gradua, bideragarritasuna, kapazitatea, eskalagarritasuna, ingurumenari egiten zaion ekarpena, eta eraldaketarako potentziala.

Produktu zirkularrena

Produktu zirkularrenaren kategorian, Basque Circular BEST saria Fagor Ederlanentzat izan da, bere Portamangueteas STA produktuagatik: ibilgailuaren segurtasunerako funtsezkoa den osagai bat, hiru sistema bateratzen dituena: direkzioa, moteltzea eta balaztaketa. Portamanguetas deritzanak nabarmen murrizten du karbono-aztarna, birziklapen estandar handiak aplikatzen direlako; arindutako diseinu bat, isurketak nabarmen murrizten dituena. Epaimahaiak bere aluminiozko diseinu berritzailea hartu du kontuan, eta, halaber, lehengaiaren % 80 sekundarioa dela eta pisua % 51 txikiagoa dela.

Horrez gain, kategoria honetan bi akzesit eman dira: bata Asalfatiari, lehengai sekundarioak txertatzeagatik errepideetarako nahasketa bituminosoetan (bai kautxuzko hondakinak eta bai arku-elektrikoko altzairutegitik datozen agregakin siderurgikoak), eta bestea Kooperari, gizarte-inklusioaren arloan egiten duen lanagatik; izan ere, ehunkien hondakinak berriz aprobetxatzeko soluzioak eskaintzen ditu, birziklatutako hari berriak ekoizteko, eta baita isolamendu termiko eta akustikoko panelak ere, etxebizitzen barneko holtzetarako; panel horiek kotoi- eta poliester-zuntzetatik abiatuta lortzen dira, herritarrek berrerabilerarako edukiontzietara botatzen dituzten ehun-hondakinetatik tratatu ondoren.

Zerbitzu zirkularrena

Zerbitzu zirkularrenerako saria Somos Orekarentzat izan da, elikagaien soberakinak emateko eta berriz aprobetxatzeko zerbitzua emateko plataformagatik (Software as a Service); izan ere, horri esker lortu dute hilean 50 tona elikagai gutxiago xahutzea, soberakinak erakundeen jantoki korporatiboetan, supermerkatuetan eta beste enpresa batzuetan jasoz, soberakin horiek segurtasunez eman ahal izateko. Gainera, aplikazioak ahalbidetzen du aldizka errepikatzen diren dohaintzak programatzea, eta horrela murrizten dira bai eskuratzeko denbora eta bai elikagaien xahuketa.

Horrez gain, epaimahaiak akzesit bat eman dio RECIRCULAR enpresari, hondakin industrialak, soberakinak, materialak eta erabilitako ekipoak balorizatzeko (hau da, bigarren bizitza emateko) plataformagatik, zeren horren helburua baita beste enpresa batzuek birziklatu edo berrerabili ahal izan ditzatela Gainera, plataformak berak kalkulatzen ditu hondakin horien aprobetxamenduak sortzen dituen ingurumen- eta gizarte-onurak.

Negozio-eredurako saria

Negozio-eredu zirkularraren kategorian, saritua Gamesa Gearbox enpresa izan da. Enpresa honek eboluzionatu du produktuen fabrikazio soiletik aerosorgailuetako piezen birmanufakturan oinarritutako negozio-eredu berri batera, bigarren bizitza emanez, biderkagailu eolikoen kasuan bezala, haien bizitza % 125 luzatu baita. Epaimahaiak baloratu osagaien birfabrikazioan oinarritutako negozio-eredu baten enpresa-finkapena.

Start up baten soluzio onena

Fuelium izan da startup zirkularrenaren kategorian saritutako enpresa, bere paperezko bateriengatik: erabilera bakarreko gailu eramangarrietan aplikatzeko ekodiseinatuta daude, in vitro eta zaintza pertsonaleko diagnostikoetan, hala nola haurdunaldi-probak, odol- eta listu-analisiak, besteak beste. Era horretan, soluzio lehiakor bat diseinatu du lehengaien eta fabrikazioaren kostuen aldetik, hondakinen sorrera murriztuz. Bateria material jasangarri ez-toxikoz osatuta dago, eta horrek ahalbidetzen du paperez eta kartoiz birziklatzea, biodegradagarriak eta konpostagarriak izateaz gain.

BEST sarien lehenengo edizioa Basque Circular Summit 2025aren esparruan antolatu da, hau da, Europako hegoaldeko ekonomia zirkularrari buruzko biltzar handienean. Eusko Jaurlaritzako Ihobe – Ingurumen Jarduketarako Sozietate Publikoak antolatuta, apirilaren 2tik 4era bitartean egiten da, eta 1.300 aditu eta 150 hizlari baino gehiago bilduko ditu, europar araudi eta plangintza berriek euskal enpresetan izango dituzten inplikazioak jorratzeko.

Basque Circular Summit 2025 kongresuaren lehen egunean ekonomia zirkularrak Europan dituen etorkizuneko erronkak aztertu dira

admin — Wed, 02 Apr 2025 15:07:51 +0000

FORUM biltzar-eremuan eguneko ekitaldi garrantzitsuenak gauzatu dira: mahai-inguruak, Europako legediari buruzko eztabaida, Imanol Pradales lehendakariaren irekiera ekitaldia eta Europako Batzordeko eta Europako Ingurumen Agentziako ordezkarien solasaldiak

Bigarren espazioan, Basque Circular EXPO-an, Euskadiko ehun enpresa ingururen 150 soluzio eta produktu zirkular baino gehiago erakutsi dituzte

Basque Circular VILLAGE-a euskal zirkulartasunerako trantsizioa bultzatzen duten hogei bat eragileen zein erakundeen jardunaren eta proiektuen erakusleiho bilakatu da

Basque Circular Summitek, ekonomia zirkularrari buruzko Europako hegoaldeko ekitaldi nagusiak, helburutzat izango du Europako Batzordearen plangintza berriaren, araudiaren eta berriki onartu den Itun Industrial Garbiaren inplikazioak jorratzea, euskal enpresek aurrea hartu diezaieten ekonomia zirkularraren eta deskarbonizazioaren erronka globalei. Biltzarra apirilaren 2tik 4ra bitartean egingo da Euskalduna Bilbaon.

Egitarau oparoarekin burutu da lehen jardunaldia; Europako eta Euskadiko ekonomia zirkularraren erronkak eta aukera nagusiak jorratu dira, zirkularitaterako digitalizaziotik hasi eta diseinura, negozio eredu berriak eta sinbiosi indutriala barne. Kongresua datorren ostiralean amaituko da.

Lehen biltzar-eremuan, Basque Circular FORUM-ean, eguneko ekitaldi garrantzitsuenak gauzatu dira: mahai-inguruak, Europako legediari buruzko eztabaida, Imanol Pradales lehendakariaren irekiera ekitaldia eta Europako Batzordeko eta Europako Ingurumen Agentziako ordezkarien solasaldiak. Inaugurazio-hitzaldian, lehendakariak Euskadiko eragile sozioekonomiko guztiak egiten ari diren lana azpimarratu du, ekonomia zirkularraren eredu berri baterako trantsiziorako bidean. “Gure Industria Plana Europako jarraibideekin lerrokatzen ari gara, Euskadi eragile garrantzitsua izan daitekeelako eta izan behar duelako prozesu horretan. Zumeak ditugu horretarako”, nabarmendu du Pradales lehendakariak.

Jarraian, Mónica Chaok hartu du hitza. Chao Acativa Partners enpresako sortzaile eta bazkide zuzendaria da, eta, besteak beste, jasangarritasun estrategikoan, enpresa-eraldaketan eta ESG lidergoan aditua. Bere hitzetan, “Europak eraldaketa industriala beharrezkoa du jasangarritasunaren bidez lehiakortasuna sustatzeko, eta, Euskadik, bide hori hartu du”. “Apustu Industrial Garbia baliatuz -jarraitu du-, deskarbonizazioaren, berrikuntzaren eta ekonomia zirkularraren alde egitea, autonomia industriala indartzeko eta aurreikusteko moduko eta erresilientziazko lege-ingurunean kalitatezko enpleguak sortzeko aukera estrategikoa da”.

Basque Circular Summit-en baitan antolatu den erakusketak agerian utzi du Euskalduna Jauregiak hartu duen jardunaldia ez dela jardunaldi soila, haratago doan ekimena baizik. 100 enpresa baino gehiagok parte hartu du, eta, guztira, 150 produktutik gora aurkeztu dira, gehienak, % 70 pasatxo, produktu berriak. Antolatzaileen hitzetan, erakusketa erakusleiho paregabea da EAEko industria araugintzako eta merkatuko eskakizun berrietara egokitzen ari dela egiaztatzeko.

Estreinako eguna

Basque Circular Summit 2025 jardunaldiaren estreinako egunean, ontzien inguruko hitzaldiak entzuteko aukera izan da. Bertan, lege betekizun berriak aztertu dira eta produktuen ontziratze-prozesuan erreferente diren enpresen arrakasta-kasuak erakutsi dira. Era berean, ehungintza sektoreaz hitz egin da, zehatz mehatz, ehungintza produktuak iraunkorragoak, konpongarriagoak, berrerabilgarriagoak, birziklagarriagoak izateko gakoak azaldu dira, modako joerak alboratzeko eta berrikuntza estimulatzeko.

Lehengai kritikoak eta eraikuntzako materialak ere protagonista izan dira eguerdian, oinarrizko lehengaien hornidura segurua eta iraunkorra bermatzeko Europako araudi berria aurkeztuz. Era berean, eraikuntzaren sektorearen egungo egoera eta joera berriak aztertu dira.

Azkenik, ekonomia zirkularraren alorrean Europak dituen erronkak izan dira hizpide, eta, erronka horiek gobernu-eskala ezberdinetan nola islatuko diren aztertu da. Era berean, hainbat sektoretako produktuetan pasaporte digitala nola aplikatzen den ikusi da, betebeharrak eta mugak zerrendatuz, eta balio-kate desberdinetan nola aplika daitekeen adieraziz.

Pradales Lehendakaria: “Gure Plan Industriala europar jarraibideekin lerrokatzen ari gara, Euskadi eragile garrantzitsua izan daitekeelako eta izan behar duelako prozesu horretan”

admin — Wed, 02 Apr 2025 11:41:51 +0000

Imanol Pradales Lehendakariak inauguratu egin du Basque Circular Summit 2025 biltzarra; Ihobe sozietate publikoak antolatuta, apirilaren 2tik 4ra bitartean egingo da, Euskalduna Bilbaon

Industriaren eta ingurumenaren arloko kontinente osoko 1.300 profesional eta adituk aztergai izango dituzte Europar Batasunaren plangintza eta araudi berriek euskal industria-ehunean izango dituzten inplikazioak, besteak beste alor hauetan: ekodiseinuaren araudia, produktuaren pasaporte digitala, ontziak, ehunkiak, eraikuntza, lehengai kritikoak, eraikuntzako materialak, teknologia garbiak edo finantza jasangarriak, beste askoren artean

Biltzarrak bereizitako hiru eremu ditu: FORUM biltzar-eremua; produktu eta soluzio zirkularren EXPO erakusleihoa; eta standen eremua, VILLAGE izenekoa; bertan, Eusko Jaurlaritzarekin batera, Nafarroako Gobernuak eta Kataluniako Generalitatek konpartitzen dute protagonismoa, parte hartzen duten hogei erakunde ingururen artean

Imanol Pradales Lehendakariak Basque Circular Summit inauguratu du gaur goizean, hau da, Europako hegoaldeko ekonomia zirkularrari buruzko biltzar nagusia, apirilaren 2tik 4ra bitartean Euskalduna Bilbaon egingo dena; bertan, xehetasunez aztertuko dira plangintza eta araudi berrien eta Europako Batzordeak berriki onartu duen Itun Industrial Garbiaren inplikazioak. Horren helburua da euskal enpresek aurrea hartu diezaietela ekonomia zirkularraren eta deskarbonizazioaren erronka globalei. Lehendakariarekin batera, inaugurazioan egon dira Industria, Trantsizio Energetiko eta Jasangarritasun sailburu Mikel Jauregi, Trantsizio Energetikoko sailburuorde Irantzu Allende, Ingurumeneko sailburuorde Josu Bilbao eta Ihobeko zuzendari nagusi Alexander Boto.

naugurazio-hitzaldian, Lehendakariak nabarmendu egin du Euskadiko eragile sozioekonomiko guztiak egiten ari diren lanaren balioa, ekonomia zirkularreko eredu berrira zuzendutako trantsizioan, eta azpimarratu du “gure Plan Industriala europar jarraibideekin lerrokatzen ari garela, Euskadi eragile garrantzitsua izan daitekeelako eta izan behar duelako prozesu horretan”. Badugu horretarako beharrezkoak diren gaitasunak”.

Horrez gain, Imanol Pradales Lehendakariak hausnarketa egin du “erauzi, ekoiztu, erabili eta botatzean” oinarritutako kontsumo-eredu konpultsiboaz, eta esan du hori iraganean geratu behar dela. “Beste eredu bat jarri behar dugu horren ordez, alegia, lehengaien eta energiaren erabilera murriztu eta hondakin gutxiago sortzen dituen eredu bat; produktuen balio-bizitza luzatzea eta lehiakortasunean irabaztea ahalbidetzen digun eredu bat. Xahuketa saihestu, iraunkortasuna erreibindikatu eta baliabideen erabilera efizientea egiten duen eredu bat”. “Euskadin loratzen ari dira aukera industrial berriak sortzen ari diren proiektuak”, esan du bukatzeko.

Euskadiko 2024ko Ingurumen-koiunturaren Txostenak islatzen duenez, Euskadik jauzi esanguratsua egin du efizientziaren alorrean. 2005az geroztik, Euskadiko biztanle bakoitzeko materialen kontsumoa 8 tonatan murriztu da: Europako batezbestekoa hobetzen duen datu bat. Gainera, Barne Produktu Gordinaren eta Materialen Etxeko Kontsumoaren arteko erlazioa neurtzen duen produktibitate materialaren indizea 1,49tik 3,79ra pasatu da; beraz, lortu da ekonomia hazi dadila baliabide gutxiago erabiliz.

Lehendakariak hitz egin ostean, Wiliam Nealek eta Ionnis Bakasek ere parte hartu dute, Europako Batzordearen eta Ingurumenaren Europar Agentziaren ordezkari gisa, hurrenez hurren, eta horiek ere azpimarratu dute Euskadi ekonomia zirkularraren erreferente bat dela Europan eta bide onetik doala.

Europako hegoaldeko ekonomia zirkularrari buruzko biltzar nagusia

Basque Circular Summit 2025 ekonomia zirkularraren aldeko konpromisoaren emaitza da, eta baita Euskadiren lidergoa indartzeko tresna nagusietako bat ere. “Time for Action” (jarduteko garaia da) lemapean, aurtengo edizioa ekonomia zirkularraren erronka eta aukera nagusiak jorratzen dituen egitarau batez abiatu da.

Biltzarrak, gainera, 150 hizlari baino gehiago ditu: Europako Batzordearen ordezkariak, zirkulartasunaren arloan aurrendari diren enpresa-liderrak, eta jasangarritasunaren arloan ospea duten beste aditu batzuk; horiek guztiek, hiru egunez, esperientziak eta ideiak konpartituko dituzte etorkizun ekonomiko jasangarriagoa eraikitzeko.

Horietako bat Mónica Chao da, jasangarritasun estrategikoaren, enpresa-eraldaketaren eta ESG lidergoaren Espainiako profesional aditu bat, Acativa Partnersen sortzaile eta bazkide zuzendaria; honek goraipatu du Euskadik egiten duen lana, bai zirkulartasunaren arloan eta bai negozio jasangarrien eredu berrien aldeko bultzadan.

“Europarentzat beharrezkoa da lehiakortasuna jasangarritasunaren bidez bultzatzen duen eraldaketa industrial bat, eta Euskadik urte batzuk daramatza ildo horretatik. Deskarbonizazioaren, berrikuntzaren eta ekonomia zirkularraren alde egitea da, Clean Indstrial Deal-areki batera, aukera estrategiko bat gure autonomia industriala indartzeko eta kalitatezko enpleguak sortzeko, aurreikustekoa eta erresilientea den lege-testuinguru batean”, nabarmendu du Chaok.

Hiru biltzar ekitaldi batean bilduta, eta 1.300 pertsona baino gehiago bertaratuta

Basque Circular FORUM biltzar-eremuan, Europar Batasunetik eratorritako plangintza eta araudi berriek euskal industria-ehunean izango dituzten inplikazio guztiak aztertuko dira, hainbat saio eta ekitaldi paralelorekin. Hori guztia zenbait gai jorratuz egingo da, hala nola ekodiseinuaren erregelamendua, produktuaren pasaporte digitala, ontziak, ehunkiak, eraikuntza, ingurumena-ebaluatzeko tresnak, negozio-eredu zirkularrak, lehengai kritikoak, eraikuntzako materialak, teknologia garbiak, europar taxonomia edo finantza jasangarriak, beste askoren artean.

Nolanahi ere, Basque Circular Summit 2025 biltzar-eremu bat baino zerbait gehiago da; izan ere, badu Basque Circular EXPO ere, non ehun enpresa inguruk 150 soluzio eta produktu zirkular baino gehiago erakutsi dituzten, eta, hortaz, erakusleiho paregabea izango da Euskadin produktu jasangarri eta lehiakorren aldeko apustua egiten ari diren enpresa handi eta ETEen kopuru handia deskubritzeko.

Gainera, biltzarrak badu Basque Circular VILLAGE deritzana, hots, stand eta networkingerako espazio bat; bertan, euskal zirkulartasunerako trantsizioa bultzatzen duten hogei bat eragile eta erakundek euren jarduna eta proiektuak erakusten dizkiete biltzarrera etorritako pertsonei. Eusko Jaurlaritza stand batez egongo da bertan, ekonomia zirkularra Euskadin bultzatzen ari diren ekimen batzuk aurkezteko, hala nola Basque Ecodesign Cener, Euskadiko ETE Zirkularra, Basque Circular Hub edo Industriari Laguntzeko 2025eko Plana. Eusko Jaurlaritzarekin batera, Nafarroako Gobernuak eta Kataluniako Generalitatek ere konpartitzen duten protagonismoa, parte hartzen duten beste hogei erakunderekin baino gehiagorekin.

Basque Circular Summit 2025ek euskal enpresak prestatuko ditu Europako Itun Industrial Garbi berritik eratorritako inplikazioetarako

admin — Wed, 26 Mar 2025 11:25:49 +0000

Orain arte, Eusko Jaurlaritzak bultzatu du ekonomia zirkularrean oinarritutako 5.000 zuzeneko enpleguren sorrera.

2005az geroztik, materialen kontsumoa 8 tonatan murriztu da Euskadiko biztanle bakoitzeko: Europako batezbestekoa hobetzen duen datu bat.

Apirilaren 2tik 4ra bitartean Euskalduna Bilbaon egingo den biltzarrak 140 hizlari izango ditu, eta dagoeneko 1.000 pertsona baino gehiago inskribatu dira.

Basque Circular Summitek aztertuko ditu Europar Batasunetik eratorritako plangintza eta araudi berriek euskal industria-ehunean izango dituzten inplikazio guztiak.

Basque Circular Summitek, ekonomia zirkularrari buruzko Europako hegoaldeko ekitaldi nagusiak, helburutzat izango du Europako Batzordearen plangintza berriaren, araudiaren eta berriki onartu den Itun Industrial Garbiaren inplikazioak jorratzea, euskal enpresek aurrea hartu diezaieten ekonomia zirkularraren eta deskarbonizazioaren erronka globalei. Ihobe – Eusko Jaurlaritzako Ingurumen Jarduketarako Sozietate Publikoak antolatuta, biltzarra apirilaren 2tik 4ra bitartean egingo da Euskalduna Bilbaon, 140 hizlari izango ditu, eta dagoeneko 1.000 pertsona baino gehiago ditu inskribatuta.

2020. urteaz geroztik, Europak neurri handiko bi krisi izan ditu aurrez aurre, hots, pandemiak eta Errusiaren Ukrainako inbasioak eragindako krisiak. Lehengaien eta energiaren prezioen aldakortasunak gogor jo du europar ekonomia. Lehiakortasun industrialaren galerak sortutako kezka gero eta handiagoaren testuinguru horretan, Europako Batzordearen presidentziak Draghi txostena enkargatu zuen 2023an: “Europar produktu gehiago, europar enplegu gehiago”. Txosten horrek ekonomia zirkularraren garrantzia nabarmentzen du, EBrentzako abantaila lehiakor gisa; azpimarratzen duenez, ingurumen-jasangarritasunari lagundu ez ezik, ekonomia zirkularrak aukera ekonomiko esanguratsuak eskaini ere egiten ditu, zeren kostuak murriztu eta merkatu berriak irekitzen baititu.

Draghi txostenaren gomendioek inspiratuta, Europako Batzordeak bere “EBren lehiakortasunerako iparrorratza” plazaratu zuen 2024ko hasieran, hau da, lehiakortasun industriala indartzeko estrategia bat, geroago -aurten- osatu dena Itun Industrial Garbiarekin (Clean Industrial Deal). Honek zirkulartasuna eta deskarbonizazioa integratzen ditu, sektore industrialaren ingurumen-aztarna murrizteko eta beraren efizientzia, berrikuntza eta autonomia estrategikoa hobetzeko. Itun Industrial Garbiaren funtsezko zutabeetako bat zirkulartasuna da, honela ulertuta: lehengaien kontsumoa murriztea eta materialen aprobetxamendua beren bizi-ziklo osoan maximizatzea.

Testuinguru horretan, Eusko Jaurlaritzak, Ihobe – Ingurumen Jarduketarako Sozietate Publikoaren bitartez, Basque Circular Summitaren edizio berri bat bultzatzen du; bertan, Europar Batasunetik eratorritako plangintza eta araudi berri horiek euskal industria-ehunean izango dituzten inplikazio guztiak aztertuko dira.

Horrela geratu da islatuta Euskalduna Bilbaon gaur egindako agerraldian; bertan, Eusko Jaurlaritzako Trantsizio Energetikoaren sailburuorde Irantzu Allendek, Eusko Jaurlaritzako Ingurumen sailburuorde Josu Bilbaok, Ihobeko zuzendari nagusi Alexander Botok eta Ihobeko Ekonomia Zirkularraren arloko zuzendari José María Fernándezek ekonomia zirkularraren gakoak azaldu dituzte, eta baita Basque Circular Summit 2025aren gakoak ere.

”Euskadin konpromiso irmoa dugu hartuta trantsizio horrekin, bai beharrezkoa delako eta bai aukera handi bat delako gure enpresentzat. Erreferenteak gara eta izaten jarraitu nahi dugu Europako beste herrialde eta eskualde batzuentzat, alor horretan. Garbi erakutsi dugu lidergoa gureganatu dugula bide horretan”, azpimarratu du Irantzu Allende sailburuordeak.

Hiru biltzar ekitaldi batean bilduta

Basque Circular Summit 2025 ekonomia zirkularraren aldeko konpromiso horren isla izango da, eta baita Euskadiren lidergoa indartzeko tresna nagusietako bat ere. Biltzar honetan, enpresek, administrazioek eta adituek esperientziak eta ideiak konpartituko dituzte ekonomiaren etorkizun jasangarriagoa eraikitzeko. Orobat, ekitaldia trantsizio zirkularra azkartzeko katalizatzaile bihurtzen da, bai Euskadin eta bai Europan.

Biltzarraren lema “Time for Action” izango da, hots, jarduteko garaia da. “Hitzetatik ekintzetara pasatzeko garaia da; bada garaia pentsatzeko ezen, kontzeptu teorikoen gainetik, ekonomia zirkularrak eragin positiboa duela enpresen emaitzetan, baliabideen efizientzian eta ingurumen-inpaktuaren murrizketan”, nabarmendu du Ihobeko zuzendari nagusi Alexander Botok.

Horretarako, egitarau handinahi eta mardula prestatu da, ekonomia zirkularraren erronka eta aukera nagusiei heltzeko. Basque Circular FORUMek bilduko ditu nazioarteko ospea duten hizlariak, Europako Batzordeko ordezkariak, zirkulartasunaren arloan aurrendari diren enpresari liderrak eta jasangarritasunaren eremuko akademiko ospetsuak.

Azpimarratzekoak dira, besteak beste, Janez Potočnik, NBIPko IRPren presidentziako kidea, STH kofinantzatailea eta europar komisario ohia; Mónica Chao Janeiro, Espainiako aditu nagusietako bat jasangarritasun estrategikoaren, enpresa-eraldaketaren eta ESG lidergoaren alorretan; eta Brenda Chávez, ikerketa, datu eta soluzioen kazetaria.

Hiru egunetan, biltzarra ardatz tematikoen inguruan egituratuko da, besteak beste gai hauek jorratuz: zirkulartasunerako digitalizazioa, diseinu zirkularra, negozio-eredu berriak eta sinbiosi industriala. Europar legediari buruzko mahai-inguruak egongo dira, eta baita osoko saioak, tailer praktikoak eta enpresetarako bisitak ere.

Bigarren espazioan, hots, Basque Circular EXPOn, 100 enpresa inguruk parte hartuko dute, 150 produktu zirkular baino gehiago erakutsiz. Erakusleiho hau adibiderik onena izango da ikusteko enpresa handi eta ETE askok ekonomia zirkularraren aldeko apustua egin dutela eta haien produktu eta prozesuak jasangarri eta errentagarriak direla. Bertaratuko direnen artean, Basque Circular EXPOk sektore guztietako enpresak bilduko ditu: automobilgintza, elikadura, eraikuntza eta energiaren arlokoak, besteak beste.

Hirugarren espazioan, Basque Circular VILLAGE izenekoan, ekonomia zirkularra Euskadin bultzatzen duten eragileen ekosistema ikusi ahal izango da, enpresaren eta zientziaren arloko eragileekin eta eremu akademikoko eta gizarte-inguruneko eragileekin. Horretarako, standak eta networking uztartzen dituen eremu hau sortu da, haien ideiak erakusteko eta inbertitzaileekin zein enpresa finkatuekin konektatzeko aukera izan dezaten.

Basque Circular Summit 2025aren parte-hartzeari dagokionez, biltzarrean parte hartzeko interesa duten pertsonen eta erakundeen 1.000 inskripzio baino gehiago jaso dira dagoeneko, eta horrek erakusten du ekonomia zirkularraren inguruko interesa eta konpromisoa gero eta handiagoak direla.

Aurten, gainera, Basque Circular Summt 2025ek nobedade garrantzitsu bat izango du, alegia, Basque Circular BEST 2025 sariak banatuko direla aurreneko aldiz. Helburua da biltzarrean aurkeztutako soluzio eta proiekturik onenak aitortzea, haien inpaktua eta bideragarritasun ekonomikoa oinarritzat hartuta.

Ekonomia zirkularra Euskadin

Euskadiko 2024ko Ingurumen-koiunturaren Txostenak islatzen duenez, Euskadik jauzi esanguratsua egin du efizientziaren alorrean. 2005az geroztik, Euskadiko materialen kontsumoa 8 tonatan murriztu da biztanle bakoitzeko: Europako batezbestekoa hobetzen duen datu bat. Gainera, Barne Produktu Gordinaren eta Materialen Etxeko Kontsumoaren arteko erlazioa neurtzen duen produktibitate materialaren indizea 1,49tik 3,79ra pasatu da; beraz, lortu da ekonomia hazi dadila baliabide gutxiago erabiliz.

Europako Batzordeak kalkulatzen duenez, ekonomia zirkularra ezartzeak 1,8 bilioi euroko mozkin ekonomikoa ekar lezake 2030erako kontinente osoan. Ekonomia zirkularreko estrategiak ezartzearen alde egin duten euskal enpresek % 12 igo dute, batez beste, euren fakturazioa. Datu horrek erakusten du zirkulartasunak lehiakortasuna handitzen duela eta negozio-aukera berriak sortzen dituela.

Enpresak erronka horri erantzuten ari zaizkio, berrikuntzan eta sorkuntzan inbertituz. Materialen berrerabilera, ekodiseinua eta sinbiosi industriala gero eta ohikoagoak dira Euskadiko ehun ekonomikoan, eta horrek ahalbidetu du lehengaien batez besteko kontsumoa % 20 murriztea.

Helburua da Euskadi ekonomia zirkularrean oinarritutako enpleguaren erreferente bihurtzea, trantsizio hori bultzatzen duten kalitatezko lanpostuak sortuz. Orain arte, 5.000 zuzeneko enplegu sortu egin dira. Aurreikusten da trantsizio horrek 700.000 lanpostu berri sortu ahal izatea Europan 2030erako.

Orobat, Eusko Jaurlaritzako Ingurumen sailburuorde Josu Bilbaok azpimarratu du zergatik den beharrezkoa, ingurumen-arrazoiengatik, ekonomia zirkularra sustatzea. Hala, Eusko Jaurlaritzaren apustu irmoari esker, 2018az geroztik % 54 murriztu da zabortegietara iristen diren hondakinen kantitatea. “Hori guztia posible izan da politika publiko handinahiak aplikatu direlako eta 31,2 milioi euro inbertitu direlako isurketak minimizatzeko eta haien berrerabilera material sekundario gisa sustatzeko”, azpimarratu du.

Era horretan, Euskadi hondakinen balorizazio eta isurketaren murrizketa aldetik tasarik onenak dituen eskualdeetako bat bihurtzen da, estatuko batezbestekoa gaindituz eta europar helburu zorrotzenekin bat etorriz. Euskadiko Hondakinak Prebenitzeko eta Kudeatzeko 2030erako Plana horren adibide bat da, murrizketa, berrerabilera eta birziklapenerako neurri konkretuekin.

Orobat, Euskadik puntako azpiegiturak sortzearen alde egin du, hondakinak industriarako baliabide berri bihurtu ahal izateko, kanpoko lehengaiekiko mendetasuna murriztuz eta autonomia industriala indartuz. Ikuspegi horrek Itun Industrial Garbiaren aplikazioaren erreferente gisa kokatu du Euskadi, bai estatuan eta bai Europan, zeren erakutsi baitu zirkulartasuna lehiakortasun eta deskarbonizazioaren motor bat dela.

Euskal enpresek ekonomia zirkularrarekin hartuta duten konpromisoa indartuko dute Basque Circular EXPOn

admin — Sat, 15 Mar 2025 08:00:27 +0000

Ia ehun enpresak berretsi dute euren parte-hartzea 150 soluzio zirkular eskainiko dituen erakusketan.

Basque Circular EXPO erreferentziazko ekitaldi gisa finkatzen da enpresentzat, euren ekonomia zirkularraren arloko soluzioak eta nobedadeak erakusteko.

Basque Circular EXPO ekonomia zirkularrera zuzendutako mugarri gisa agertzen da, jasangarritasuna ardatz estrategikotzat hartu duten 90 euskal enpresaren parte-hartzarekin. Euskadin ekoiztutako produktu zirkularren erakusketa honetan, 150 berrikuntza baino gehiago erakutsiko dira; horietatik, % 70 soluzio berriak dira, eta horrek frogatzen du euskal industria egokitzen ari dela erregulazioaren eta merkatuaren betekizun berrietara.

Makineriaren sektoreak -honek Euskadiko industriaren balio erantsi gordinaren % 10 sortzen du- presentzia azpimarragarria izango du erakusketan. Parte hartuko duten enpresek ekodiseinua, efizientzia energetikoa eta ekoizpen-eredu jasangarri berriak integratzen dituzten soluzioak erakutsiko dituzte. Beste alde batetik, elikagaien industriak, beste erronka batzuen artean elikagaien xahuketa eta ontzi jasangarrien ezarpena aurrez aurre dituenez, Elikagaien Galera eta Xahuketa Prebenitzeari buruzko etorkizuneko legea betetzeko funtsezkoak diren ekimenak aurkeztuko ditu.

Basque Circular EXPOn protagonismoa izango duen beste sektore estrategiko bat sektore elektriko-elektronikoa izango da, zeren aurrera egiten ari baita konponketarako eta material kritikoen berrerabilerarako eskubidearen inplementazioan, haien ingurumen-inpaktua murrizteko. Ildo horretatik, Ekodiseinuaren Erregelamendu berriarekin bat datozen berrikuntzak aurkeztuko dituzte, produktuen efizientzia, iraunkortasuna eta birziklagarritasuna hobetzera zuzenduta. Eraikuntzaren arloan, Euskadiko hondakinen % 20 inguru sortzen dituenez, azoka baliagarria izango da eraisketa selektibora, material birziklatuen erabilerara eta agregakinen erauzketaren ingurumen-inpaktua murriztera zuzendutako soluzioak erakusteko.

Basque Circular EXPO ez da berrikuntzaren erakusleihoa soilik izango, baizik eta baita euskal enpresa-ehunaren lehiakortasuna definituko dituzten estrategiei buruzko eztabaida-gune bat ere, kontuan hartuta merkatuak gero eta betekizun zorrotzagoak ezartzen dituela jasangarritasun aldetik. Negozio-eredu zirkularrak integratzeko, materialen trazabilitatea bermatzeko eta ingurumen-gardentasunaren inguruko eskari gero eta handiagoari erantzuteko beharra izango da ekitaldiko saioetako gai nagusietako bat.

Ekonomia zirkularra lehiakortasunerako funtsezko faktorea izanik, euskal enpresak aurrerapauso bat egiten ari dira erreferente gisa kokatzeko, eredu ekonomiko efizienteago eta jasangarriago batean. Basque Circular EXPO konpromiso horren froga izango da, eta Euskadi finkatuko du zirkulartasunerako trantsizioaren lurralde aurrendari gisa.

Euskal enpresak ekonomia zirkularraren erronken aurrean: egokitzapena, berrikuntza eta lehiakortasuna

admin — Tue, 11 Mar 2025 11:11:23 +0000

Ekonomia zirkularrerako trantsizioak markatuko du euskal enpresa-ehunaren etorkizun lehiakorra

Basque Circular Summit 2025 enpresentzako topalekua izango da, bertan konpartituko baittuzte gero eta zorrotzagoa den merkatu honen erronkei aurre egiteko estrategiak

Ekonomia zirkularra ez da gehiago aukera bat soilik, baizik eta baita euskal enpresen lehiakortasunerako betekizun bat ere, kontuan hartuta arau-testuingurua eta merkatua gero eta zorrotzagoak direla. Karbono-neutraltasunera egokitzea, ekoidiseinuari buruzko europar erregelamendua betetzea eta ingurumen-gardentasuna hobetzeko beharra enpresa-ehunaren etorkizuna markatuko duten funtseko faktore bihurtu dira. Jokaleku horretan, Basque Circular Summit 2025 eraldaketa hori gidatzen duten estrategiak eta soluzioak entzuteko topagunea izango da; bertan, gainera, lehiakortasuna datozen urteetan definituko dituzten erronkak aztertu ere egingo dira.

Basque Ecodesign Centerrek Ingurumen Zaintza Estrategikoari buruz egin duen azken txostenak identifikatu ditu euskal enpresek aurrez aurre dituzten erronkak, merkatuan duten posizioa sendotzeko, kontuan hartuta jasangarritasuna ez dela enpresa-erantzukizunaren kontu bat soilik, baizik eta baita bezeroak, finantzazioa eta inbertsioak eskuratzeko funtsezko faktore bat ere. Karbono-aztarna murriztea lehentasun bat izango da, eta ez nazioarteko konpromisoengatik bakarrik, baizik eta baita europar erregulazioak betekizun zorrotzagoak ezarriko dituelako sektore industrial estrategikotan. Euskadik jadanik murriztu du % 33 bere berotegi-efektuko gasen isurketak 2005az geroztik, baina oraingo erronka da teknologia garbien ezarpena azkartzea eta industria deskarbonizatzea, eta horrek eragina izango du bai enpresa handietan eta bai ETEetan.

Halaber, Basque Circular Summit 2025 baliagarria izango da Ekodiseinuari buruzko Europar Erregelamendu berria eztabaidatzeko, zeren honek enpresak behartuko baititu zirkulartasun-irizpideak beren produktuetan txertatzera, diseinutik hasita eta haien bizitzaren amaierara arte. Euskadin, 300 enpresak baino gehiago badituzte -edo izango dituzte- betebeharrak ingurumen-gardentasunaren arloan, eta hor sartzen dira bai jasangarritasunari buruzko txostenak eta bai produktuaren pasaporte digitalak. Gainera, Euskadiko 250 instalazio industrial baino gehiago Isurketa industrialen Zuzentarau berriaren mende egongo dira, eta horrek behartuko ditu eskura dauden teknikarik onenak eskuratzera ekoizpen-prozesuen ingurumen-inpaktua murrizteko.

Baina erronka ez da ekoizpenera mugatzen. Enpresen gaineko presioa gero eta handiagoa izango da, bai greenwashinga saihesteko eta bai euren ingurumen-komunikazioa zorrotza eta egiaztagarria dela bermatzeko. Erregulazioa zorrotzagoa izango da euren klima-konpromisoetan gardenak ez diren enpresentzat edo fidagarritasun gutxiko informazioa eskaintzen dituztenentzat. Beste alde batetik, merkatuak penalizatuko ditu ekonomia zirkularreko estrategiak euren negozio-ereduan integratzen ez dituzten enpresak; izan ere, oraingo testuinguruan, lehengaien eskasiak behartzen du kanpo-baliabideekiko mendetasuna murriztera eta lehengai sekundarioen erabilera bultzatzera.

Abian dagoen eraldaketak zuzeneko inpaktua izango du finantzazioa eskuratzeko aukeretan. Europar taxonomiak eta finantza jasangarriek bereizkuntza bat ezarriko dute inbertsioak eskuratu ditzaketen enpresen eta euren hazkunde-ahalmena mugatuta izango dituztenen artean. Ingurumen-informazioaren kudeaketa funtsezkoa izango da ETEentzat, zeren betekizun berrietara egokitu beharko dira balio-kate osoan, euren produktuen inpaktuaren ebaluazioarekin hasita eta finantza-jasangarritasuneko irizpideekin lerrokatzera iritsiz.

Euskal enpresa-ehunaren lehiakortasunari buruz egin duen azken balorazioan, Basque Ecodesign Centerrek azpimarratzen du Euskadik posizio ona duela, Europako beste eskualde batzuekin alderatuta, funtsezko neurriak hartu dituelako, azkar, ekonomia zirkularrerako trantsizioan. Nolanahi ere, ohartarazten du beharrezkoa izango dela teknologia garbietara zuzendutako inbertsioa errazten duten tresna publikoak indartzea, lankidetza publiko-pribatua eta jardunean dauden profesionalen prestakuntza indartzeaz batera. Gako horiek izango dira Basque Circular Summit 2025en ardatza. Foro horretan, sektorearen erronkak aztertuko dira eta soluzioak konpartituko dira, helburu honekin: bermatzea euskal enpresek jarraitu dezatela eraldaketa jasangarria gidatzen eta euren lehiakortasuna mantendu dezatela merkatu globalean.

Osoko saioen streaming-a ingelesez eskuragarri egongo da

admin — Thu, 06 Mar 2025 09:00:46 +0000

Streaming-a jarraitzeko esteka ekitaldia hasi baino egun batzuk lehenago jakinaraziko da

Bertaratzerik ezin izango duten nazioarteko ikusleek edukia errazago jarraitu ahal izango dituzte

Basque Circular Summit 2025 biltzarrak osoko saioetan parte hartu ezin dutenek aukera izango dute hitzaldiak zuzenean jarraitzeko streaming bidez. Saio nagusi horiek ingelesezko aldi bereko itzulpena izango dute, nazioarteko ikusleek edukia errazago jarraitu ahal izateko.

Garrantzitsua da kontuan hartzea ingelesezko itzulpena eta streaming-a soilik osoko saioetan eskainiko direla. Saio paraleloek eta side event-ek ez dute itzulpen zerbitzurik izango. Streaming-a jarraitzeko esteka ekitaldia hasi baino egun batzuk lehenago jakinaraziko da, eta webgune ofizialean eskuragarri egongo da.

Europako hegoaldean ekonomia zirkularrean erreferente den Basque Circular Summit 2025 biltzarra apirilaren 2, 3 eta 4an egingo da. Beste behin, eta dagoeneko seigarrena da, industria, erakunde eta aditu nagusiak bilduko dira, enpresen eta sektore ezberdinen arteko lankidetza eta berrikuntza bultzatzeko helburuarekin.

Ekitaldia presentziala izango da, eta parte-hartze handia izaten ari da. Bertan, EXPO, Village eta Forum espazioetan ekonomia zirkularrean aurrera egiten ari diren enpresa eta erakundeek soluzio berritzaileak aurkeztuko dituzte. EXPO gunean teknologia eta proiektu aurreratuak erakutsiko dira, Village espazioak networking-ari eta esperientzien elkartrukeari bide emango dio, eta Forum-ean ekonomiaren trantsizio zirkularrari buruzko eztabaidak eta ponentziak izango dira.

Basque Circular Summit 2025 topagune estrategikoa izango da, berrikuntza, industria eta lankidetza estrategikoaren bidez trantsizio zirkularra azkartzeko.

Basque Circular Summit 2025 biltzarrak ekitaldi jasangarrien Erronka Garbia ziurtagiria du

admin — Tue, 04 Mar 2025 09:00:27 +0000

Basque Circular Summit 2025, ekonomia zirkularrari buruzko Europako hegoaldeko ekitaldi nagusia ez ezik, topaketa jasangarrien antolakuntzaren erreferentea ere bada. Eusko Jaurlaritzako Ihobe – Ingurumen Jarduketarako Sozietate Publikoak bultzatutako biltzar honek Erronka Garbia ziurtagiria du: aitortza bat, bere plangintza eta garapenean ingurumen-inpaktua murriztearekin eta jardunbide arduratsuak sustatzearekin hartutako konpromisoa bermatzen duena.

Erronka Garbia ingurumen-kalitatearen zigilu bat da, Eusko Jaurlaritzak bere sozietate publiko Ihoberen bitartez bultzatzen duena; bere helburua da bermatzea ekitaldiek euren aztarna ekologikoa minimizatzen dutela, antolaketan neurri jasangarriak txertatzearen bidez.

Erronka Garbia-Ekitaldi Jasangarria izeneko ziurtagiriaren helburua da ekitaldira bertaratzen diren pertsonak eta erakunde antolatzaileak kontzientziatzea ekitaldi jendetsuen garapenari lotutako inpaktu negatiboak arintzeko beharraz.

Ziurtagiri hau lortzeko, Basque Circular Summit 2025ek protokolo hau jarraitu du:

Mugikortasun jasangarria: garraio publikoaren, ibilgailu konpartituaren eta mugikortasun aktiboaren (bizikleta, oinez mugitzea) erabilera sustatzen du, karbono-aztarna murrizteko xedez.
Efizientzia energetikoa: energia berriztagarrien erabilera eta kontsumo elektrikoaren optimizazioa lehenesten ditu.
Uraren kudeaketa arduratsua: uraren kontsumoa minimizatzeko eta alferrikako erabilera saihesteko neurriak inplementatzen ditu.
Erosketa jasangarriak: material birziklatuak edo birziklagarriak erabiltzen ditu ekitaldiaren ekoizpenean, erabilera bakarreko plastikoen erabilera ahalik eta gehien murriztuz.
Azpiegitura arduratsuak: espazio eta muntaketen aukeraketak ingurumen-inpaktu ahalik eta txikiena izatea bermatzen du.
Hondakinen murrizketa eta kudeaketa: ekitaldian sortutako hondakinen berrerabilera, birziklapena eta bereizketa egokia bultzatzen ditu.

Ekitaldi jasangarriko eredu bat

Erronka Garbia ziurtagiria ez da aitortza bat soilik, baizik eta baita printzipioen adierazpen bat ere. Ihoberentzat, ekitaldiaren antolatzailea den aldetik, funtsezkoa da Basque Circular Summit 2025ek ekonomia zirkularra sustatu dezala, baina ez ikuspegi teorikotik eta enpresaren ikuspegitik soilik; izan ere, horrez gain garrantzitsua da printzipio horiek biltzarraren antolaketan eta gauzapenean ere aplikatzea.

Gainera, ekimen horrek ohitura jasangarriak hartzearen garrantziaz sentsibilizatu nahi ditu erakundeak eta bertaratzen diren pertsonak, erakutsiz posible dela ingurumen-inpaktua murriztea ekitaldiaren kalitateari eta esperientziari kalterik egin gabe.

Basque Circular Summit 2025ek aztarna positiboa utzi nahi du, ekitaldia egitetik harago. Erronka Garbiaren estandarrekin hartutako konpromisoari esker, erreferentzia baliagarria izango da ingurumena gehiago errespetatzen duen kudeaketa-eredu baten alde egin nahi duten beste ekitaldi batzuetarako.

Erronka Garbiari buruzko informazio gehiago